John 6

YisasiꞋa faefu tauseniꞋa (5,000) veneꞋnemogami kavela amamine.

1HaenagaꞋa YisasiꞋa tipi kalefi uno Kalili* li kotuna takaeno umaine. Ani li kotumona nago agia Taipiliasie.* 2MukiꞋa veaꞋmoꞋya kaliꞋamima alino kanale hu-ma-teno tokiya avame yama higeꞋyama agaya yafe akave umainae. 3Vageno YisasiꞋene agaiꞋaenema tokaeꞋya nemaiya anagaꞋaene agoꞋyale haiꞋya mopale mainae. 4Yuta vayaꞋmoꞋya Anumaya KotiꞋma amakinagomogami amaugafama ali-gati-mainea yafe amakesa havisaya imu* kisaya kanaꞋa ago aupa hu-maine.

5YisasiꞋa ageno ataleno ageana mukiꞋa veaꞋmoꞋya agaitega neꞋageno amaketeno Filipife mage hie “Hanateti ani veaꞋmoꞋyama nesaya kavela miya hugahune?” huno hie. 6YisasiꞋa Filipina ayevataga huno mani kea nehuno agayama hugahema hia yana ago havimaineno hu-maine.

7FilipiꞋa mage hie “Nago kanomoꞋa tu hataletia (200) kanale aliꞋyana aliteno miya alino ani monea ataleno kaveꞋma miya hisiana ma mukiꞋa veakefafina osi osi huꞋya kavela alite alite hugahae.” huno hie. 8Higeno nago kanoa agaiꞋaenema tokaeꞋya nemaiya anagaꞋamogamipitila, Saimoni Pitana aganaꞋamoꞋa EtaluꞋa, mage huno hie “Nago nafaꞋnemoꞋa faefuꞋa (5) mayagi tole noyamegi huno ali-lino maine. Veakefamo alino ala higeno mani kavela osi kanoꞋa haneanagi hanaꞋa huno taya hisie?” huno hie. 10Higeno YisasiꞋa agaiꞋaenema tokaeꞋya nemaiya anagaꞋamofe mage hie “MukiꞋa veakefa ‘Mopale maiho.’ hutama hama-paiho.” huno hama-paiye. Ani kumala mukiꞋa apeꞋage hanea kumalagiꞋya mukiꞋa veakefa mopale mainae. Ani veala faefu tauseniꞋa (5,000) veneꞋne mainae.

11YisasiꞋa ani maya alino Anumaya Kotitega muse huno havigeteno mukiꞋa mopale mainaya veaꞋmogamina fako huno amamite amamite hu-maine. Noyamene ani kava higeno mukiꞋa veaꞋmoꞋya ani kavela nageno amamu hu-maine. 12Nemamu hu-male-tageno YisasiꞋa agaiꞋaenema tokaeꞋya nemaiya anagaꞋamofena mage hie “MukiꞋa atupa-tapa kavela alitalu hu-tama maleho. NagoꞋa osi osi atupa vitali vitali ohiho.” 13Amakaya mukiꞋa veala faefuꞋa (5) maya kanoꞋafiti neteꞋya atalaya atupayaga alitalu huꞋya tuelufuꞋa (12) kula ai-havate-mainae.

14AnifiꞋma mainaya veakefamoꞋya YisasiꞋma hu-mainea tokiya avame yana ageteꞋya mage hae “Tamage huno Anumaya Kotina aune kanoꞋa hu-tesigeno ma mopafima egahiema huno hu-mainea kanoa mama ago emaine.” huꞋya hae. 15Hageno YisasiꞋa vayaꞋmoꞋyama hisaya kavala aguꞋafinaga mage huno havimaine “Mani vayaꞋmoya nagaila sauveꞋami maisua yafe navalegahe nehae.” huno nehuno neꞋamataleno agaiꞋage agoꞋyafi hai-maine.

YisasiꞋa ti avoyale neꞋvie.

16YagemoꞋa lavi-falegeno une avamemaꞋa agaiꞋaenema tokaeꞋya nemaiya anagaꞋamoꞋya ala ti agegayalega uteꞋya tipi kalefi asaga hu-maiꞋya Kapaneamu vayana YisasiꞋa amakaiꞋenena oꞋune. OꞋvigeꞋya yaufa uge uge huꞋya neꞋvageno hani ki-ma-tene. 18Ala yasigefamoꞋa eno tina melino mo ai-yahae me ai-yahae huno tusiya hu-maine. 19Tusiya higeꞋya tipi kalefima mainaya vayaꞋmoꞋya yosaleti vailagai-liꞋya vayana nagoꞋa ayaꞋayaꞋa sikisiꞋa (6) kilomita ti kotuꞋmona amuꞋnopi neꞋuꞋya agayana YisasiꞋa ti avoyale aiya ayeme ayeme tipi kalema hanelega neꞋegeꞋya ageteꞋya tusiya huꞋya kolia hu-mainae.

20Koli nehageno YisasiꞋa mage huno hama-paiye “Kolia ohiho mamona nagayae.” huno hama-nepaiye. 21Hama-paigeꞋya vayaꞋmoꞋya Yisasina tipi kalefi haisaga hu-maisia yafe muse nehuꞋya tipiti avalesaga nehae. Ani tipi kalemoꞋa visaya kumatela aupaꞋa uvaꞋyi hu-maine.

VeaꞋmoꞋya Yisasife ati maiꞋya aye-mainae.

22FaeteꞋya kotigeꞋya tikotuꞋmona atu kaiyaga mainaya veaꞋmoꞋya ageteꞋya mage hae “Nagoke tipi kaleꞋage hanegeta age-mainone. YisasiꞋenema tokaeꞋya nemaiya anagaꞋage ani lipi kalefi vayanagi YisasiꞋa oꞋunegi ani vayala amakaiꞋamige umainae.” huꞋya hae. 23Ani kumala YisasiꞋa Anumayamotega nunamu huno muse huteno kavela amamigeꞋya ne-mainaya kumate nagoꞋa lipi kaleyaga Taipiliasi kumateti anile neꞋae. 24NeꞋeꞋya mukiꞋa veaꞋmoꞋya megayana YisasiꞋenema tokaeꞋya nemaiya anagaꞋene omainageꞋya megeteꞋya tipi kalefi asaga hu-maiꞋya Kapaneamu Yisasife mo atiye-mainae.

YisasiꞋa Ikapinaga mayae.

25Atiyeme valegati atu kaiyaga umaineꞋya Yisasina mogeteꞋya mage hae “Hulave-nelina kanomoga na yu ma kumala meli-mainane?” huꞋya havinegae. 26Havigageno YisasiꞋa mage hie “Nagaya tamagelafa huꞋna tamaha-nepauve tamakaya kaveꞋma tamamugetama nageno tamamuꞋma hu-mainea yafe natia neꞋayayanagi nagaila tokiya avame yama hugetama age-mainaya yafena natia noꞋayae. 27Tamakaya kasalisia kavefena maitama ati oꞋayeho. Maige maigema hisaya kavefeꞋke maitama atiyeho. Nagaya NenafaꞋa, Anumaya Koti hu-na-tenea kanomoꞋna ikapinagati emainoa kanoa vayaꞋmo natenea kanomoꞋna mani kavela tamamigahue.” huno hie.

28HigeꞋya mage huꞋya havinegae “Tagaya hanaꞋa huta Anumaya Koti aliꞋyana alisune?” huꞋya havinegae. 29Hageno YisasiꞋa mage hie “Mani aliꞋyana Anumaya KotiꞋa muse nehia aliꞋyane. Agayama hu-tegeno emainea nafaꞋnemofe tamakupi maletama tamametiti hisaya yafe muse nehie.” huno hie. 30HigeꞋya mukiꞋa veaꞋmoꞋya mage hae “Hana augafa tokiya avame yana tave-lisanageta ageteta tagupina maleta tametiti hisune? 31Nayona taginagomoꞋya vaya omai kotega maineꞋya nago kavela agia manae nehaya kave ne-mainayane huno kae-maleneane

‘Ikapinagati maya amamigeꞋya ne-mainae.’
huno kaemaleneane.” huꞋya nehae.

32Hageno YisasiꞋa mage hie “Nagaya tamage-lafa huꞋna tamaha-nepauve ikapinagati elavi-mainea maya MoseseꞋa agaiꞋa oꞋamaminegi NenafaꞋa ikapinagati tama maya menia nelamamie. 33Anumaya KotiꞋma tamamia mayamoꞋa maꞋa hu-maine nago kanoa ikapinagati ea maya mainea yafe ma mopale mainaya veala hamaimula amamine.” huno hie.

34HigeꞋya mage huꞋya hae “Ala kanomogae mukiꞋa kanalela ani maya tamige lamige huo.” huꞋya hae. 35Hageno YisasiꞋa mage huno hama-nepaiye “Nagaya hamaimu amamisua maya mainoe. Nagaitegama esia veaꞋmoꞋya nagoꞋene amakala otegahae. Nagayama hu-lama-tesua yafe amakuꞋafi maleꞋya amametiti hisaya veaꞋmoꞋya tifena oꞋamakegahae.

36Nagaya ago tamaha-paugetama nagaila ago nagemainayanagi nagaya hu-lama-tesua yafena tamakupina maletama tamametitia nohae. 37MukiꞋa NenafaꞋma naminea veaꞋmoꞋya nagaitega egahae. Nago kanomoꞋma nagaitegama esigeꞋnahena ‘Eteka vuo.’ huꞋna hu oꞋategahue. 38Hu-na-tenea kanomoꞋma haisia kavaꞋma hisua yafe ikapinagatila hu-nategeꞋna emainoe. NagaiꞋniꞋa nagesafiti kavala hugahe omenoe. 39Hu-na-tenea kanomoꞋma haisia kavaꞋma hisuana maꞋa hu-maine naminea veaꞋnefitila nagoke kanoꞋa fanane ohisageꞋna ma mopama haꞋnoma hisia kanafina mukiꞋa fali-mainesafiti ali he-ti-matesugeꞋya agola maige maige hugahae. 40NenafaꞋa maꞋa yafe musena nehie mukiꞋa veaꞋmoꞋya nafaꞋneꞋamona neꞋageꞋya agayama hu-matesia yafe havilama huꞋya amakupi maleꞋya amametiti hisayana agola maige maige yana aligahae. AlitesageꞋna ma mopama haꞋno hisia kanafina nagaya fali-mainesafitila ali he-ti-ma-tesugeꞋya agola maige maige huꞋya maigahae.” huno hu-maine.

41YisasiꞋma “Nagaya ikapinagati elavi-mainoa maya mainoe.” huno hu-mainea kehe Yuta veaꞋmoꞋya Yisasifena ke vaiꞋya kasagoꞋya ke hu-tenae. 42Mage huꞋya nehae “Ma kanoa YisasiꞋa, Yosefe nafaꞋnefi? NefaꞋene itaꞋamoene ago age-mainone. NaꞋa higeno menia ‘Ikapinagati elavi-mainoa kano mainoe.’ huno nehie.” huꞋya hae.

43Hageno YisasiꞋa kenonaꞋamia mage huno hie “Tamakaya tamakaitamifima kasagoꞋya kema hatagaya kea ataleho. 44Nago kanomoꞋa nagaitega agaiꞋa nomegi hu-na-tenea Nenafa avayu hinageno nagaitega enageꞋna nagaya ma mopama haꞋno hisia kanafina fali-mainesifiti ali he-ti-tesugeno haimula aligahie.

45Anumaya Koti aune vayaꞋmoꞋya mage huꞋya kae-malenayane

MukiꞋa veaꞋmogamina Anumaya KotiꞋa hu-maveli hamaveli hugahie huꞋya kae-malenayane.
MukiꞋa veaꞋmoꞋya NenafaꞋma hu-mavelia kea haviteꞋya akave malenaya veaꞋmoꞋya nagaitega neꞋae. 46Nago kanomoꞋa Nenafana oꞋageneanagi Anumaya Kotitegati emainea kanomoꞋa agaiꞋage Nefana age-maine.

47Tamage-lafa huꞋna tamaha-nepauve nagaifema haviꞋya amakupi maleꞋya amametiti hu-mainaya veaꞋmoꞋya agola maige maige hisaya hamaimula ago ali-mainae. 48Nagaya nagaiꞋniꞋa hamaimu amamisua maya mainoe. 49Ani tamakinagomoꞋya vaya omai kotega maineꞋya nago kaveꞋmo agia manae huꞋya nahaya kave ne-mainayanagi ago fali-mainae. 50Fali-mainayanagi maꞋa augafa ikapinagati elavia maya nesaya veaꞋmoꞋya ofaligahae. 51Nagaya Ikapinagati elavi-mainea maya mainoe. Ani mayamona haimuꞋa hane. NagoꞋa veaꞋmoꞋya mani mayama nesayana agola maige maige hugahae. Ani maya nagaiꞋniꞋa naugafae. Ma mopaleꞋma mainaya veala agola maige maige hisaya yafe naugafa ataleteꞋna faligahue.” huno hie.

52HigeꞋya Yuta vayaꞋmoya mani kehena ke vaiꞋya mage huꞋya hae “Mani kanomoꞋa hanaꞋa huno augafaꞋa taminegeta nesuna yafe nehie?” huꞋya hu-mainae. 53Nageno YisasiꞋa mage hie “Nagaya tamage-lafa huꞋna tamaha-nepauve tamakayama ikapinagati emainoa kano vayaꞋmo na-tenea nafaꞋnemoni naugafaene kolaniꞋaenema onesayana maige maige hisaya tamahaimula tamakupina omalegahie. 54NagoꞋa veaꞋmoꞋya naugafaene kolaniꞋaenema nesayana agola maige maige hisaya hamaimula ago ali-mainayanagiꞋna ma mopama haꞋno hisia kanafina fali-mainesafitila ali he-ti-ma-tegahue. 55Nagai naugafa, kave tama hane. KolaniꞋaenena tama li hane. 56NagoꞋa veaꞋmoꞋya naugafaene kolaniꞋaenema nesayana nagai nagupi mainageꞋna nagaya aniꞋa huꞋna amakai amakupina mainoe. 57NenafaꞋa haimuꞋaene kanomoꞋa hu-nateneanagino nahaimula namigeꞋna mainoe. NagoꞋa veaꞋmoꞋya nagai naugafama nesayana nagai tokiyafiti hamaimula aliteꞋya maigahae. 58Ikapinagati elavi-mainea maya maꞋa augafa maya hane. Yuta vayaꞋmogami amakinagomoꞋya ne-mainaya maya kana ohune. Ani maya neteꞋya ago fali-mainayanagi nagoꞋa veaꞋmoꞋya ikapinagati elavi-mainea mayama nesayana agola maige maige hugahae.” huno hie. 59YisasiꞋa mani kea Kapaneamu mono nopi huno hama-pai-mainea ke.

YisasiꞋa agola maige maige hisaya yafe hu-maine.

60MukiꞋa akaveꞋma neꞋvaya veaꞋmoꞋya ani kea haviteꞋya mage huꞋya hae “Manima hu-mave-lia kemoꞋa tusiꞋa kana nelahaiye. Hana kanomo mani kea haviteno akave malesia amukoꞋa hane?” huꞋya hae. 61Hageno YisasiꞋa ani kehena akaveꞋma neꞋvaya veaꞋmoꞋya kasagoꞋya kema haya kea ago aguꞋafinaga haviteno mage huno hie “Mani kemoꞋa otamahaifi? Natalesaya tamakesa nehavifio?” huno hamavi-nege. 62Nagayama, ikapinagati emainoa kanoa vayaꞋmo natenea kanomoꞋna, eteꞋnama hagoteꞋna nemauva kumateꞋma visugetama nagesayana hanaꞋa hugahae? 63Anumaya Koti AvamuꞋmoꞋa maige maige hisaya tamahaimula nelamianagi tamakai tamaugafamoꞋa nagola kanale yana notamamie. Nagaya Anumaya Koti AvamuꞋmoꞋa naminea ke tamaha-pai-mainoe. Ani kemoꞋa maige maige hisaya tamahaimula nelamamie. 64Mani kea tamaha-pai-mainoanagi “NagoꞋamogatama ani kehena tamakupina alitama nomalae.” huno nehuno nayoma aepa he-mainea kanafina YisasiꞋa amakupi maleꞋya amametiti ohisaya veaꞋene agaiꞋama agesi huno kame ya hu-tesia kanoene ago haviline. 65YisasiꞋa nagoꞋene mage hie “Ani yafe mage huꞋna tamaha-pai-mainoane nagoke veala amakaiꞋamia nagaitega omegahagi Nenafa esaya amaku amakesa amamisigeꞋya nagaitega egahae.” huno hie.

66Mani kema higeꞋya kasagoꞋya akaveꞋma umainaya veala eteꞋya mai-yahae huꞋya ataleꞋya umaineꞋya nagoꞋene agaiꞋenena me vai-oꞋayenae. 67YisasiꞋa tuelufuꞋa (12) anagaꞋamogamife mage huno hamavi-nege “Tamakaya aniꞋa hutama nagaila natalegahao?” huno hamavi-nege. 68Hamavi-gegeno Saimoni PitaꞋa kenonaꞋa mage hie “Anumayamoga hana kanomote visune? Kagai kemoꞋa maige maige hisuna tahaimula nelamie. 69Tagaya ago havilinone kagaya alu aotage kavaꞋage kanoa Anumaya KotiꞋa hu-gategeka emainananagita kagaifena tagaya tagupi maleta tametitia ago hu-mainone.” huno hie.

70Higeno YisasiꞋa mage hie “Tamakaya tuelufuꞋa (12) anagaꞋnimogatamina nagaya ago hapali-lama-tenoamagi tamakaipina nago kanomoga Kefo AvamuꞋene mainane.” huno hie. 71Mani kema hiana Yutasife hu-maine. YutasiꞋa Saimoni Isakaliotina nafaꞋneꞋamoꞋe. TuelufuꞋa (12) anagapiti Yisasina agesi huno kame ya hu-tesia kanohe hu-maine.